ក្រុមហ៊ុន Amon World Communications គ្រោងបង្កើតរោងចក្រផលិតខ្សែភ្លើងដោយប្រើបច្ចេកវិទ្យាជប៉ុននៅកម្ពុជា ដែលរោងចក្រនេះនឹងរួមចំណែកពង្រឹងសុវត្ថិភាពហេដ្ឋារចនាសម្ព័ន្ធ និងការធ្វើពិពិធកម្មឧស្សាហកម្ម និងខ្សែច្រវាក់ផ្គត់ផ្គង់ក្នុងស្រុក។

ជាក់ស្តែង នៅក្នុងជំនួបពិភាក្សាការងារជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងក្រុមហ៊ុនបានលើកឡើងថា រោងចក្រនេះនឹងផលិតខ្សែភ្លើងគុណភាពខ្ពស់ ដោយប្រើប្រាស់ប្រព័ន្ធគ្រប់គ្រងគុណភាព និងសុវត្ថិភាពរបស់ជប៉ុន ព្រមទាំងផ្ទេរចំណេះដឹងផ្នែកត្រួតពិនិត្យគុណភាព សុវត្ថិភាពអគ្គិសនី និងបណ្តុះបណ្តាលអ្នកបច្ចេកទេសកម្ពុជាផងដែរ។ 

ឯកឧត្តម ហែម វណ្ណឌី ក៏បានស្វាគមន៍គម្រោងវិនិយោគនេះ និងបានលើកឡើងថា កម្ពុជាមិនត្រឹមតែចង់ផលិតជំនួសទំនិញនាំចូលមួយចំនួនប៉ុណ្ណោះទេ យើងចង់ក្លាយជាប្រទេសដែលអាចផលិតនាំចេញ និងមានការទទួលស្គាល់ជាអន្តរជាតិ។

ឯកឧត្តមបានបន្តថា ក្រសួងអាចគាំទ្រដល់គម្រោងវិនិយោគនេះ រួមទាំងដំណើរការបង្កើតរោងចក្រ ការអភិវឌ្ឍស្តង់ដា ការធ្វើតេស្តផលិតផល ការផ្ទេរបច្ចេកវិទ្យា និងការភ្ជាប់ក្រុមហ៊ុនជាមួយអ្នកទិញសក្តានុពល ដូចជារោងចក្រដំឡើងយានយន្ត និងក្រុមហ៊ុនផលិតផលិតផលអគ្គិសនី និងអេឡិចត្រូនិកជាដើម។

ឯកឧត្តមរដ្ឋមន្ត្រីបានបន្ថែមថា ខ្សែភ្លើងដែលផលិតក្នុងស្រុក និងស្របតាមស្តង់ដាអន្តរជាតិ អាចផ្គត់ផ្គង់ដល់វិស័យយានយន្ត និងឧស្សាហកម្មដែលកំពុងរីកចម្រើននៅកម្ពុជា ព្រមទាំងមានសក្តានុពលនាំចេញទៅកាន់ទីផ្សារក្នុងតំបន់។

ក្រុមហ៊ុន AMON ក៏បានបើកការិយាល័យនៅកម្ពុជាកាលពីខែសីហា និងគ្រោងបង្កើតរោងចក្ររបស់ខ្លួននៅកម្ពុជា ក្នុងឆ្នាំ២០២៧។ ម្ចាស់ភាគហ៊ុនធំរបស់ក្រុមហ៊ុននេះ គឺក្រុមហ៊ុនជប៉ុន Nichigoh Communication Electric Wire Co., Ltd. ដែលផលិតខ្សែភ្លើង និងខ្សែកាបផ្គត់ផ្គង់ដល់ទីផ្សារអន្តរជាតិមួយចំនួនផងដែរ៕