បញ្ហាប្រសិទ្ធភាពការងាររបស់បុគ្គលិកធ្លាក់ចុះ គឺជាក្តីកង្វល់ដ៏ធំមួយសម្រាប់អ្នកដឹកនាំ និងម្ចាស់អាជីវកម្ម ហើយវាអាចនាំទៅរកអន្តរាយដល់ស្ថាប័នទាំងមូល។ ខាងក្រោមនេះគឺជា ក្បួនទាំង ៥ ដើម្បីកម្ចាត់ភាពខ្ជិលច្រអូស និងជំរុញឱ្យបុគ្គលិកត្រលប់មកខំប្រឹងធ្វើការវិញយ៉ាងមានប្រសិទ្ធភាព យោងតាម Forbes Advisor៖

១/. កំណត់គោលដៅឱ្យច្បាស់លាស់៖ បុគ្គលិកភាគច្រើនខ្ជិល ដោយសារពួកគេមិនដឹងថាត្រូវធ្វើអ្វីឱ្យប្រាកដ ឬមិនយល់ពីសារៈសំខាន់នៃកិច្ចការនោះ។ ការប្រើប្រាស់គោលការណ៍ SMART Goals (ជាក់លាក់, វាស់វែងបាន, អាចសម្រេចបាន, ត្រឹមត្រូវ និងមានពេលកំណត់) នឹងជួយឱ្យពួកគេដឹងពីផ្លូវដែលត្រូវដើរ។ នៅពេលបុគ្គលិកដឹងថា លទ្ធផលបែបណាដែលក្រុមហ៊ុនចង់បាន ពួកគេនឹងមានភាពម្ចាស់ការលើការងារជាងមុន។

២/. បង្កើតប្រព័ន្ធលើកទឹកចិត្ត និងរង្វាន់៖ មនុស្សធ្វើការដើម្បីផលប្រយោជន៍។ ប្រសិនបើធ្វើល្អ និងធ្វើអាក្រក់ទទួលបានលទ្ធផលដូចគ្នា នោះបុគ្គលិកនឹងជ្រើសរើសផ្លូវ ធ្វើតិចតួច។ ការដាក់ចេញនូវប្រព័ន្ធ KPI ដែលភ្ជាប់ជាមួយរង្វាន់លើកទឹកចិត្តដូចជា ប្រាក់លើកទឹកចិត្ត ការសរសើរជាសាធារណៈ ឬឱកាសឡើងតំណែង គឺជាកម្លាំងរុញច្រានដ៏ខ្លាំងក្លាបំផុត។

៣/. តាមដាន និងផ្តល់មតិត្រលប់ជាប្រចាំ៖ កុំរង់ចាំដល់ចុងឆ្នាំទើបវាយតម្លៃការងារ។ ការខ្ជិលច្រអូសអាចកែប្រែបានតាមរយៈការជួបជជែកគ្នាប្រចាំសប្តាហ៍។ ការផ្តល់មតិត្រលប់ បែបស្ថាបនា ជួយឱ្យបុគ្គលិកដឹងពីចំណុចខ្វះខាតរបស់ខ្លួនភ្លាមៗ និងមានអារម្មណ៍ថាថ្នាក់លើកំពុងយកចិត្តទុកដាក់លើការខិតខំរបស់ពួកគេ។

៤/. ពង្រឹងវិន័យ និងស្ដង់ដារការងារ៖ ភាពធូររលុងនៃច្បាប់ទម្លាប់ គឺជាអាហារបំប៉ននៃភាពខ្ជិល។ ក្រុមហ៊ុនត្រូវមាន SOP ច្បាស់លាស់។ ប្រសិនបើបុគ្គលិកមិនគោរពតាមបទបញ្ជាផ្ទៃក្នុង ឬធ្វើការមិនគ្រប់កម្រិតស្ដង់ដារ ត្រូវមានវិធានការណែនាំ ឬព្រមានទៅតាមឋានានុក្រម ដើម្បីបង្ហាញថាភាពខ្ជិលមិនត្រូវបានអនុញ្ញាតក្នុងស្ថាប័នឡើយ។

៥/. ផ្ដល់ឱកាសក្នុងការអភិវឌ្ឍសមត្ថភាព៖ ពេលខ្លះបុគ្គលិកខ្ជិល ដោយសារពួកគេមានអារម្មណ៍ថាការងារដដែលៗ គួរឱ្យធុញ។ ការរៀបចំវគ្គបណ្តុះបណ្តាលខ្លីៗ ឬការផ្ដល់ទំនួលខុសត្រូវថ្មីៗដែលប្លែកពីមុន នឹងជួយដាស់ចំណង់ចង់ចេះចង់ដឹង និងថាមពលក្នុងខ្លួនពួកគេឱ្យងើបឡើងវិញ។

យ៉ាងណាមិញ ការជំរុញប្រសិទ្ធភាពការងារ និងការលុបបំបាត់ភាពខ្ជិលច្រអូសក្នុងស្ថាប័ន មិនមែនជារឿងដែលត្រូវប្រើតែវិធានការតឹងរ៉ឹងមួយមុខនោះទេ ប៉ុន្តែវាគឺជាសិល្បៈនៃការរួមបញ្ចូលគ្នារវាងការកំណត់គោលដៅច្បាស់លាស់ ការបង្កើតប្រព័ន្ធលើកទឹកចិត្តដែលយុត្តិធម៌ និងការផ្តល់មតិត្រលប់តាមដានជាប្រចាំ ដើម្បីឱ្យបុគ្គលិកម្នាក់ៗយល់ពីតម្លៃនៃតួនាទីរបស់ខ្លួន។ នៅពេលដែលអ្នកដឹកនាំអាចដុតបញ្ឆេះសក្តានុពល និងផ្តល់ឱកាសឱ្យពួកគេលូតលាស់ សកម្មភាពខ្ជិលច្រអូសនឹងត្រូវជំនួសដោយភាពម្ចាស់ការ និងការខិតខំប្រឹងប្រែងដែលចេញពីចិត្ត ដែលនេះគឺជាគ្រឹះដ៏រឹងមាំក្នុងការរុញច្រានស្ថាប័នឱ្យសម្រេចបាននូវជោគជ័យជារួមប្រកបដោយចីរភាព៕

អត្ថបទដោយ៖ កាន់ ដារ៉ា (ម្ចាស់ស្នាដៃសៀវភៅ បុគ្គលិកឆ្នើម)

• សម្រាប់បុគ្គលិកដែលចង់បាន ចំណូលកើន ឡើងតួនាទីលឿន
• ម្ចាស់អាជីវកម្មដែលចង់កសាងក្រុមការងារដែកថែបបង្កើតលទ្ធផលខ្ពស់
• យើងសូមណែនាំសៀវភៅ «បុគ្គលិកឆ្នើម» តម្លៃពេញ ១២$ បើកក់ឥឡូវនេះតម្លៃត្រឹមតែ ១០$ ប៉ុណ្ណោះ។   បញ្ជាទិញតាម https://t.me/BusinessCambodiaBook