ដើម្បីលើកកម្ពស់សុខុមាលភាពមាតា និងទារកឱ្យកាន់តែប្រសើរឡើង រាជរដ្ឋាភិបាលកម្ពុជាបានដាក់ចេញនូវកម្មវិធីឧបត្ថម្ភសាច់ប្រាក់យ៉ាងពិសេស សម្រាប់សមាជិកសន្តិសុខសង្គម (ប.ស.ស.)។ កម្មវិធីនេះផ្តល់ការគាំទ្រតាំងពីដំណាក់កាលពពោះ រហូតដល់កុមារមានអាយុ ២ឆ្នាំ។

ជាមួយគ្នានោះដែរ ស្រ្តីមានផ្ទៃពោះ ដែលជាសមាជិក ប.ស.ស ដែលស្ថិតក្នុងចំណោម ៥ក្រុមខាងក្រោមនេះនឹងទទួលបានប្រាក់ឧបត្ថម្ភពីរដ្ឋមានដូចជា៖

១. សមាជិក ប.ស.ស. ជាស្រ្ដីមានផ្ទៃពោះ និងនៅពេលសម្រាលកូន ដែលស្ថិតក្រោមបទប្បញ្ញត្តិនៃច្បាប់ស្ដីពី ការងារ និងមានសញ្ជាតិខ្មែរ

២. សមាជិក ប.ស.ស. ជាមន្ដ្រីរាជការ ជាស្រ្ដីមានផ្ទៃពោះក្នុងក្របខណ្ឌមុខងារ សាធារណៈ ដែលបម្រើការងារ នៅតាមក្រសួង-ស្ថាប័ន នៅថ្នាក់ជាតិនិងថ្នាក់ក្រោម ជាតិដែលស្ថិតក្រោមបទប្បញ្ញត្តិនៃច្បាប់ស្ដីពីសហលក្ខន្ដិកៈ មន្រ្ដីរាជការស៊ីវិល នៃព្រះរាជាណាចក្រកម្ពុជា

៣. សមាជិក ប.ស.ស. ជាមន្រ្ដីកម្មសិក្សា និងមន្ដ្រីជាប់កិច្ចសន្យាដែលបម្រើការងារនៅតាមក្រសួង-ស្ថាប័ន អង្គភាព នៅថ្នាក់ជាតិ និងថ្នាក់ក្រោមជាតិ ដែលមានការ ទទួលស្គាល់ដោយក្រសួងមុខងារសាធារណៈ

៤. សមាជិក ប.ស.ស. ជាស្រ្ដីមានផ្ទៃពោះ និងកុមារអាយុក្រោម ២ (ពីរ)ឆ្នាំ ដែលជាមន្ដ្រីនគរបាលជាតិ និងមន្ដ្រីពន្ធនាគារ

៥. សមាជិក ប.ស.ស. ជាស្រ្តីមានផ្ទៃពោះ និងកុមារអាយុក្រោម ២ (ពីរ)ឆ្នាំ នៃក្រុមប្រឹក្សារាជធានី ខេត្ត-ក្រុង-ស្រុក-ខណ្ឌ និងក្រុមប្រឹក្សាឃុំ-សង្កាត់។

គួរបញ្ជាក់ថា សម្រាប់ព័ត៌មានបន្ថែម សូមទំនាក់ទំនងមកកាន់លេខ ១២៩៧ ឬ ១២៨៦ ឬតាមរយៈហ្វេសប៊ុកផេកផ្លូវការរបស់ បេឡាជាតិសន្តិសុខសង្គមបានផងដែរ៕