អ្នកគ្រប់គ្រងតែងដើរតួនាទីសំខាន់ក្នុងការកំណត់ប្រព័ន្ធគ្រប់គ្រងនៅក្នុងនាយកដ្ឋានមួយ(Management​ System) ឬអាជីវកម្មទាំងមូលដោយមានទំនួលខុសត្រូវក្នុងការបង្កើតនិងអនុវត្តយុទ្ធសាស្រ្ត ព្រមទាំងត្រួតពិនិត្យចំពោះបុគ្គលិក។

ក្នុងនោះបើតាមការសិក្សាស្រាវជ្រាវអំពីភាពជាអ្នកដឹកនាំនិងការគ្រប់គ្រងនៃសាកលវិទ្យាល័យ MARYVILLE សហរដ្ឋអាមេរិក បានឱ្យដឹងថាអ្នកគ្រប់គ្រង ត្រូវមានជំនាញស្នូលធំៗចំនួន៥ដូចៗគ្នាដើម្បីធានាដឹកនាំក្រុមបានរឹងមាំ អាជីវកម្មមានប្រសិទ្ធិភាពខ្ពស់។

ជំនាញទី១ ភាពជាអ្នកដឹកនាំ៖  ជាជំនាញទន់ដែលអ្នកគ្រប់គ្រងគួរមាន ដើម្បីមានលទ្ធភាពដឹកនាំតម្រង់ទិសលើផ្នែកសមត្ថភាពនិងស្មារតីរបស់បុគ្គលិក ដូចជាការកំណត់ចក្ខុវិស័យក្រុម ការលើកទឹកចិត្តដោយសកម្មភាព ​​ មានគំនិងបែបយុទ្ធសាស្រ្ត ការគិតមានហេតុមានផល មានសមត្ថភាពក្នុងការសម្គាល់ មនុស្សត្រឹមត្រូវ ដាក់មនុស្សឱ្យត្រូវកន្លែង និងកំណត់ទំហំការងាររបស់បុគ្គលិកឱ្យមានប្រសិទ្ធិភាព។  

ជំនាញទី២ ដោះស្រាយបញ្ហា៖ ជាជំនាញទន់ដែលអ្នកគ្រប់គ្រងគួរមាន ដើម្បីមានលទ្ធភាព​ ស្វែងរកគំនិតច្នៃប្រឌិតក្នុងការស្រាយ​បញ្ហាស្មុគស្មាញ ការគិតអំពីឬសគល់របស់បញ្ហា កំណត់អត្តសញ្ញាណបញ្ហា​ ស្វែងរកដំណោះស្រាយដែលអាចទៅរួច ការគិតពីបញ្ហាប្រឈម អនុវត្តដំណោះស្រាយនិងត្រួតពិនិត្យលទ្ធផល។

ជំនាញទី៣ ទំនាក់ទំនង៖ ជាជំនាញទន់ដែលអ្នកគ្រប់គ្រងគួរមាន ដើម្បីមានលទ្ធភាពក្នុងការផ្តល់ឱ្យនិងទទួលយកមតិយោបល់របស់បុគ្គលិកឬអតិថិជន មានសមត្ថភាពក្នុងការធ្វើរបាយការណ៍ ការរាយការណ៍ ការវាយតម្លៃទៅកាន់អ្នកគ្រប់គ្រងជាន់ខ្ពស់ នាយកប្រតិបត្តិ ឬភាគហ៊ុនិក។

ជំនាញទី៤ រៀបចំនិងតាក់តែង៖ ជាជំនាញទន់ដែលអ្នកគ្រប់គ្រងគួរមាន ដើម្បីមានលទ្ធភាពធ្វើការងារជាច្រើនប្រកបដោយប្រសិទ្ធិភាព មានសមត្ថភាពក្នុងការផ្ទេរការងារ សម្គាល់ការងារដូចជាការងារសំខាន់ បន្ទាន់​ មិនសំខាន់និងមិនបន្ទាន់ជាដើម ព្រមទាំងរៀបចំទម្រង់ការងារឱ្យបុគ្គលិកនិងគម្រោងការការងារជាមួយអតិថិជន។

ជំនាញទី៥ បច្ចេកវិទ្យា៖ ជាជំនាញរឹងដែលអ្នកគ្រប់គ្រងគួរមាន ដើម្បីជាចំណេះដឹងទូទៅ ឱ្យមានលទ្ធភាពក្នុងការធ្វើអភិវឌ្ឍន៍អាជីវកម្មក្រុមហ៊ុន ឱ្យទាន់និន្នាការថ្មីៗសម្រាប់ការធ្វើទីផ្សារ ឬការធ្វើទំនាក់ទំនងសង្គមជាដើម ដែលទាក់ទងទៅនឹងវិស័យដែលខ្លួនកំពុងធ្វើ ឬពាក់ព័ន្ធជាមួយនឹងក្រុមហ៊ុនដែលខ្លួនកំពុងបម្រើការឱ្យ។

ជាការពិតណាស់ភាពរីកចម្រើននៃអាជីវកម្មមួយគឺពឹងផ្អែកលើភាពជាអ្នកដឹកនាំដ៏រឹងមាំ និងមានប្រសិទ្ធភាព ដោយក្នុងនោះអ្នកគ្រប់គ្រងអាចមានរបៀបដឹកនាំ តាមបែបផែនផ្សេងៗពីគ្នា។ ប៉ុន្តែទំនួលខុសត្រូវតែមួយដែលធំបំផុតរបស់អ្នកគ្រប់គ្រងគឺធ្វើយ៉ាងណាដឹកនាំបុគ្គលិកឱ្យកមានប្រសិទ្ធិភាពការងារ និងស្វែងរកប្រាក់ចំណេញជូនក្រុមហ៊ុន៕

អត្ថបទដោយ៖ ពីង ជូអេង