មហាសេដ្ឋី Ray Dalio ដែលជាស្ថាបនិកនៃក្រុមហ៊ុន Bridgewater Associates បានប្រាប់ចំៗថា វិនិយោគិនគួរបែងចែកយ៉ាងហោចណាស់ ១៥% នៃផលប័ត្ររបស់ខ្លួនទៅជាមាស ទោះបច្ចុប្បន្នមាសឡើងដល់កម្រិតខ្ពស់បំផុតលើសពី ៤០០០ដុល្លារ ក្នុងមួយអោនក៏ដោយ។ នេះបើយោងតាមការឲ្យដឹងពីទីភ្នាក់ងារសារព័ត៌មាន CNBC ចុះនាថ្ងៃទី ០៧ ខែតុលា ឆ្នាំ២០២៥។

លោក Dalio បាននិយាយកាលពីថ្ងៃអង្គារនៅឯវេទិកាសេដ្ឋកិច្ច Greenwich ក្នុងរដ្ឋ Connecticut យ៉ាងដូច្នេះថា៖ «ប្រសិនបើមើលតាមទស្សនៈនៃការបែងចែកទ្រព្យសម្បត្តិសកម្មជាយុទ្ធសាស្ត្រ អ្នកគួរតែមានមាស ១៥% នៃផលប័ត្រសរុប ព្រោះវាជាទ្រព្យសកម្មមួយនៅតែបន្តកើនតម្លៃខ្ពស់ ទោះក្នុងគ្រាដែលផលប័ត្រធ្លាក់ចុះ»។ លោកក៏បានសង្កត់ធ្ងន់ថា តម្លៃមាសនឹងបន្តហក់ឡើងខ្ពស់ ព្រោះសម្ពាធអតិផរណា ប្រាក់ដុល្លារចុះខ្សោយ និងភាពមិនច្បាស់លាស់នៃភូមិសាស្ត្រនយោបាយ។

គួរជម្រាបផងដែរថា ជុំវិញទំនោរឡើងកើនឡើងនេះ លោក Frank Holmes នាយកប្រតិបត្តិក្រុមហ៊ុន Global Investor និងជាអគ្គនាយកក្រុមហ៊ុន Hive Digital Technologies បានឲ្យដឹងថាតម្លៃមាសអាចនឹងហក់ឡើងដល់ ៦០០០ដុល្លារក្នុងមួយអោន នៅត្រឹមចុងអាណត្តិរបស់លោកប្រធានាធិបតី Donald Trump៕

បញ្ជាទិញតាម https://t.me/BusinessCambodiaBook