EQ (Emotional intelligence) គឺជាសមត្ថភាពក្នុងការយល់ឃើញ និងវាយតម្លៃអារម្មណ៍បានត្រឹមត្រូវនៅក្នុងខ្លួនយើងនិងចិត្តអ្នកដទៃ តាមរយៈពាក្យសម្តីនិងអាប្បកិរិយាជាដើម។
ទន្ទឹមនឹងនេះអ្នកចិត្តសាស្រ្តដែលបានទទួលការបណ្តុះបណ្តាលពីសាកលវិទ្យាល័យ Harvard អ្នកស្រីវេជ្ជបណ្ឌិត Cortney Warren បានឱ្យដឹងថាមនុស្សមាន EQ ទាប តែងតែនិយាយពាក្យឃ្លា៣ខាងក្រោមនេះ ជាញឹកញាប់ ជាមូលហេតុធ្វើឱ្យពួកគេខ្សោយទំនាក់ទំនង និងពិបាកចូលសង្គម។
១. “ខ្ញុំគឺជាខ្ញុំ ខ្ញុំមិនផ្លាស់ប្តូរទេ”៖ មនុស្សដែលមាន EQ ទាប តែងតែប្រើពាក្យថាខ្ញុំគឺជាខ្ញុំ ជាញឹកញាប់ដើម្បីគេចវេសពីការរិះគន់កែលម្អ និងប្រឆាំងអ្វីមួយដែលខ្លួនមិនពេញចិត្ត មិនចង់ធ្វើ។ ក្នុងនោះអ្នកចិត្តសាស្រ្ត ដែលមកពីសាកលវិទ្យាល័យ Harvard បានឱ្យដឹងថា អ្វីដែលត្រូវនិយាយជំនួសវិញល្អជាងពាក្យខាងលើគឺ៖“ខ្ញុំត្រូវគិតបន្ថែមទៀតអំពីអ្វីដែលអ្នកកំពុងនិយាយ ទោះបីជាមិនពិរោះស្តាប់ក៏ដោយ”។
២. “ខ្ញុំមិនខ្វល់ថា អ្នកមានអារម្មណ៍បែបណាទេ”៖ មនុស្សដែលប្រើពាក្យនេះជាញឹកញាប់ គឺជាមនុស្សមាន EQ ទាប ដោយសារការមិនយកចិត្តទុកដាក់ចំពោះអារម្មណ៍អ្នកដទៃ ជាពិសេសនៅពេលដែលពួកគេឆ្លងកាត់ពេលវេលាដ៏លំបាក។ ដូច្នេះពាក្យអ្វីដែលត្រូវនិយាយជំនួសវិញគឺ៖ “ខ្ញុំសោកស្ដាយដែលបានឮថាអ្នកមានអារម្មណ៍មិនសប្បាយចិត្ត តើខ្ញុំអាចជួយអ្នក បានយ៉ាងណាឥឡូវនេះ?”
៣. “មកពីអ្នក ទើបអារម្មណ៍ខ្ញុំបែបនេះ”៖ មនុស្សដែលមានEQខ្ពស់នឹងមិនបន្ទោសពិភពខាងក្រៅ ចំពោះអារម្មណ៍របស់ពួកគេកំពុងមាននោះទេ ប៉ុន្តែមនុស្សដែលមានបញ្ញា EQ ទាបនឹងតែងតែប្រើពាក្យបន្ទោសនេះជាញឹកញាប់។ ហេតុនេះជំនួសឱ្យពាក្យខាងលើ យើងគួរនិយាយថា៖ “ខ្ញុំកំពុងមានអារម្មណ៍រំជួលចិត្តណាស់នៅពេលនេះ ការយល់ឃើញរបស់ខ្ញុំចំពោះស្ថានភាពគឺថា….”។
យ៉ាងណាមិញតាមការលើកឡើងរបស់ អ្នកស្រីវេជ្ជបណ្ឌិត Cortney Warren ក៏បានបញ្ជាក់ផងដែរថា មនុស្សដែលមានភាពឆ្លាតវៃខាងផ្លូវអារម្មណ៍ទាប ពួកគេមានទំនោរ ខ្សោយលើកសាងទំនាក់ទំនងជាមួយអ្នកដទៃ ជាហេតុធ្វើឱ្យគេពិបាកជោគជ័យក្នុងអាជីព ប៉ុន្តែលក្ខខណ្ឌទាំងនេះនៅតែកែប្រែបាន ប្រសិនបើគេព្យាយាមពង្រឹង៕
អត្ថបទដោយ៖ ពីង ជូអេង
