ផ្សារ ជីប ម៉ុង ស៊ុបភើម៉ាឃីត ដែលជាពាណិជ្ជកម្មមួយរបស់ក្រុមហ៊ុន ជីប ម៉ុង បន្តពង្រីកខ្លួន បើកសាខាជាបន្តបន្ទាប់។ ជាក់ស្ដែងនៅថ្ងៃទី៨ ខែកុម្ភៈ ឆ្នាំ២០២៦ បានប្រកាសជាផ្លូវការក្នុងការបើកការដ្ឋានសាងសង់សាខាថ្មីមួយបន្ថែមទៀត “ផ្សារ ជីប ម៉ុង ស៊ុបភើម៉ាឃីត សាមគ្គី “ ដែលមានទីតាំងស្ថិតនៅបណ្ដោយផ្លូវ២៧១ ទល់មុខនឹងសាលាវិទ្យាល័យ ជា ស៊ីម សាមគ្គី។
នៅក្នុងពិធីបើការដ្ឋានសាងសង់ផ្សារខាងលើនេះ ក៏មានការអញ្ជើញចូលរួមក្រោមវត្តមាន លោកជំទាវ តែ សុវណ្ណី អគ្គនាយិកាពហុពាណិជ្ជកម្ម និងសមាជិកក្រុមប្រឹក្សាភិបាលក្រុមហ៊ុន ជីប ម៉ុង លោកជំទាវ គឹម ចាន់ណា នាយិកាជាន់ខ្ពស់ និងសមាជិកក្រុមប្រឹក្សាភិបាលក្រុមហ៊ុន ជីប ម៉ុង លោក អ៉ឹង វីរ: អគ្គនាយកបន្តវេនក្រុមហ៊ុន ខ្មែរ ប៊ែវើរីជីស ព្រមទាំងថ្នាក់ដឹកនាំ សហការីរបស់ក្រុមហ៊ុន ជីប ម៉ុង ផ្សេងៗទៀត។
តាមការបញ្ជាក់ពីក្រុមហ៊ុន សាខាថ្មីរបស់ផ្សារខ្មែរមួយនេះ នឹងបើកដំណើរការក្នុងពេលឆាប់ៗ ជាមួយទីតាំងស្ថិតនៅក្នុងតំបន់ដ៏មានសក្ដានុពល ទីប្រជុំជន រួមជាមួយទំនិញច្រើនជាង ១មុឺនមុខ ទាំងទំនិញក្នុងស្រុក និងទំនិញនាំចូលពីក្រៅប្រទេស សម្រាប់បម្រើ និងបំពេញតម្រូវការអតិថិជនគ្រប់វ័យ ជាមួយសេវាកម្មដ៏ល្អឥតខ្ចោះ និងបទពិសោធន៍ថ្មីនៃការទិញទំនិញ។
គួររំលឹកផងដែរថា កាលពីថ្ងៃទី៧ ខែមករា ឆ្នាំ២០២៦ កន្លងទៅនេះ ក្រុមហ៊ុន ជីប ម៉ុង បានបើកការដ្ឋានសាងសង់ផ្សារ ជីប ម៉ុង ស៊ុបភើម៉ាឃីត សាខាទី១៧ ដែលមានទីតាំងស្ថិតនៅនៅតំបន់គួរស្រូវ។ និងកាលពីថ្ងៃទី២២ ខែមករា ឆ្នាំ២០២៦ កន្លងទៅថ្មីៗនេះ ក្រុមហ៊ុន បានប្រកាសជាផ្លូវការក្នុងការបើកការដ្ឋានសាងសង់សាខាថ្មីទី ១៨ “ផ្សារ ជីប ម៉ុង ស៊ុបភើម៉ាឃីត ព្រៃស “ ស្ថិតនៅក្នុងតំបន់ព្រៃស រាជធានីភ្នំពេញផងដែរ៕
