ត្រូវប៉ាន់ហើយសម្រាប់ប្រជាកសិករខ្មែរ ខណៈកាលពីថ្មីៗនេះមានក្រុមហ៊ុនធំ បានចុះកិច្ចសន្យា ផលិតកម្មកសិកម្ម ស្តីពី ការទិញ-លក់កៅស៊ូទឹក ជ័រកៅស៊ូបង្កក ម្រេច ពោតក្រហម និងស្រូវ ពីកសិកររបស់ខ្មែរយើងក្នុងទំហំទឹកប្រាក់សរុបជាង១លានដុល្លារ។
ជាក់ស្តែង កាលពីថ្ងៃទី៣០ ខែមេសា ឆ្នាំ២០២៦ កន្លងទៅនេះ ឯកឧត្តម រស់ សូដែន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម គន់ រ័ត្នមន្នី អភិបាលរងនៃគណៈអភិបាលខេត្តត្បូងឃ្មុំ បានអញ្ជើញជាអធិបតីភាព ក្នុងពិធីចុះកិច្ចសន្យាផលិតកម្មកសិកម្មស្តីពី «ការទិញ-លក់កៅស៊ូទឹក ជ័រកៅស៊ូបង្កក ម្រេច ពោតក្រហម និងស្រូវ» រវាងក្រុមហ៊ុនចំការកៅស៊ូមេមត់ ក្រុមហ៊ុនហ៊្វុក កម្ពុជា ឯ.ក និងសហគមន៍កសិកម្មទំនើប និងសហគមន៍កសិកម្ម នៅក្នុងខេត្តត្បូងឃ្មុំ និងខេត្តកំពង់ចាម។
នៅក្នុងពិធីចុះហត្ថលេខាលើកិច្ចនេះដែរ ឯកឧត្តមរដ្ឋលេខាធិការ បានមានប្រសាសន៍ថា កិច្ចសន្យាផលិតកម្មកសិកម្មនាថ្ងៃនេះមានចំនួន ១០កិច្ចសន្យា ក្នុងនោះកិច្ចសន្យាទិញ-លក់ជ័រកៅស៊ូចំនួន ៧កិច្ចសន្យា ក្នុងបរិមាណជ័រ ១ ០៦០តោន, កិច្ចសន្យាទិញ-លក់ម្រេចខ្មៅសុវត្ថិភាពចំនួន ១កិច្ចសន្យា ក្នុងបរិមាណម្រេច ១០០តោន, កិច្ចសន្យាទិញ-លក់ស្រូវសែនក្រអូប០១ចំនួន ១កិច្ចសន្យា ក្នុងបរិមាណស្រូវសែនក្រអូប០១ ២៦,៥០តោន និងកិច្ចសន្យាទិញ-លក់ពោតក្រហមចំនួន ១កិច្ចសន្យា ក្នុងបរិមាណ ១៥០តោន សរុបជាទឹកប្រាក់ប្រមាណ ១ ៣៣៩ ១០០ដុល្លារអាមេរិក៕
