លោក ប៉ាន សូរស័ក្តិ ប្រាប់ទៅកសិករចិញ្ចឹមមាន់ ឱ្យជួយខ្លួនឯងសិន ទើបទេ​វាតាជួយតាមក្រោយ

“បងប្អូនត្រូវចងចាំថា គ្មានរបស់ណាមួយធ្លាក់ពីលើមេឃដោយឯកឯងឡើយ អ្វីៗទាំងអស់សុទ្ធតែកើតចេញពីការប្រឹងប្រែងរបស់ខ្លួនយើង! ដូច្នេះត្រូវខំប្រឹងជួយខ្លួនឯងជាមុនសិន ទើបទេវតាជួយយើងតាមក្រោយ” ។ នេះជាប្រសាសន៍លើកទឹកចិត្ត របស់រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ដល់ប្រជាកសិករចិញ្ចឹមមាន់ស្រែ នៅក្នុងឃុំដានរុន ស្រុកសូត្រនិគម នៃខេត្តសៀមរាប កាលពីម្សិលមិញ។

នាឱកាសដឹកនាំមន្ត្រីចុះពិនិត្យមើលការចិញ្ចឹមមាន់ស្រែសាកល្បង ដែលជាផ្នែកមួយនៃគម្រោងជំរុញទីផ្សារសម្រាប់កសិកម្មខ្នាតតូច (AIMS) កាលពីព្រឹកថ្ងៃសៅរ៍ ទី២០ ខែកក្កដា ឆ្នាំ២០១៩ ដើម្បីតាមដានវឌ្ឍនភាពការងារ លោក ប៉ាន សូរស័ក្តិ បានលើកទឹកចិត្តប្រជាកសិករ​ ចូលរួមជាមួយគម្រោង AIMS ដើម្បីទទួលបានការគាំទ្រផ្នែកបច្ចេកទេស និងឥណទាន (ប្រាក់កម្ចីដែលមានការប្រាក់ទាប) សម្រាប់ពង្រីកមុខរបរកសិកម្ម ជាពិសេសការចិញ្ចឹមមាន់ស្រែ ដែលកំពុងមានតម្រូវការខ្ពស់នៅលើទីផ្សារ។

លោករដ្ឋមន្ត្រី បានជម្រាបជូនប្រជាកសិករទាំងអស់ អំពីកិច្ចប្រឹងប្រែងរបស់ក្រសួងពាណិជ្ជកម្ម ក្នុងការសម្របសម្រួល និងស្វែងរកទីផ្សារថ្មីៗជូនប្រជាសហគមន៍ និងវិស័យឯកជន តាមរយៈការចងក្រងសមាគម ការដឹកនាំអភិវឌ្ឍន៍ខ្សែច្រវ៉ាក់តម្លៃផលិតផលក្នុងស្រុក និងការតភ្ជាប់ផលិតកម្មជាមួយទីផ្សារដែលមានស្រាប់ ដើម្បីកាត់បន្ថយការនាំចូលទំនិញបរទេស សំដៅលើកកម្ពស់ជីវភាពប្រជាកសិករ ក៏ដូចជាធានាការអភិវឌ្ឍវិស័យកសិ-ពាណិជ្ជកម្ម ប្រកបដោយនិរន្តរភាព។

«ក្រសួងពាណិជ្ជកម្ម មានតួនាទីសម្របសម្រួលរវាងបងប្អូន ជាមួយវិស័យឯកជន! ការចិញ្ចឹមមាន់ស្រែនេះ ត្រូវការពេលវេលា និងថវិកាច្រើនគួរសម ដូច្នះត្រូវខិតខំប្រែងប្រែងឱ្យអស់ពីលទ្ធភាព ដើម្បីកុំឱ្យរកស៊ីខាត! នៅថ្ងៃខាងមុខ យើងខ្ញុំ (ក្រសួងពាណិជ្ជកម្ម) ចង់ឃើញបងប្អូនទាំងអស់ ប្រែក្លាយពីកសិករឆ្នើម ទៅជាពាណិជ្ជករជោគជ័យ ដោយមិនគ្រាន់តែអាចផ្គត់ផ្គង់មាន់ទៅកាន់ទីផ្សារក្នុងស្រុកប៉ុណ្ណោះទេ ប៉ុន្តែថែមទាំងអាចនាំចេញទៅបរទេសថែមទៀត! ហើយនោះ ជាគោលបំណងធំនៃគម្រោងអែម (AIMS) របស់យើង» លោក សូរស័ក្តិ បានបន្ថែម។

សូមជម្រាបថា បច្ចុប្បន្នគម្រោងចិញ្ចឹមមាន់ស្រែសាកល្បង ទទួលបានការចូលរួមពីប្រជាពលរដ្ឋចំនួន ២៥០គ្រួសារ នៅក្នុងឃុំដានរុន និងឃុំគៀនសង្កែ នៃស្រុកសូត្រនិគម និងឃុំដូនកែវ នៃស្រុកពួក។ សម្រាប់ឃុំដារុន ដែលលោករដ្ឋមន្ត្រី បានចុះមកពិនិត្យថ្ងៃនេះ មានប្រជាពលរដ្ឋចំនួន ៦៥គ្រួសារ បានចូលរួមនៅក្នុងគម្រោងនេះ ហើយបានកំពុងចិញ្ចឹមកូនមាន់ស្រែ (ភ្ញាស់ដោយទូរខ្លួនឯង) ចំនួនជាង ២ម៉ឺនក្បាល ដើម្បីផ្គត់ផ្គង់ទីផ្សារ និងចែកចាយទៅដល់កសិដ្ឋានផ្សេងទៀត ក្នុងខេត្តសៀមរាបទាំងមូល ៕

អត្ថបទដោយ៖ LeEmon 

ប្រពភ៖ ក្រសួងពាណិជ្ជកម្ម 

ដើម្បីទទួលបានព័ត៌មានកាន់តែលឿន និងច្បាស់លាស់អំពីការធ្វើជំនួញឫអាជីវកម្មថ្មីៗ ប្លែកៗសូមធ្វើការទាញយកកម្មវិធីថ្មីរបស់ Business Cambodia ដូចខាងក្រោម៖

សម្រាប់អ្នកប្រើប្រាស់ Android: https://play.google.com/store/apps/details?id=com.businesscambodia.app

សម្រាប់អ្នកប្រើប្រាស់ IOS: https://apps.apple.com/kh/app/business-cambodia-app/id1460967958

ទំនាក់ទំនងផ្នែកផ្សព្វផ្សាយពាណិជ្ជកម្ម៖ ០១៧/០៩៣ ៣០០ ៧៥៥

តើលោកអ្នកពេញចិត្តអត្ថបទមួយនេះទេ?​សូមចូលរួមផ្តល់មតិកែតម្រូវ!

Online

RELATED ARTICLES