លោកស្រីឡុង រ៉ានី៖ ចេញរកស៊ីដំបូង គឺដើម្បីលុយ តែរកស៊ីយូរៗបែរជារកឃើញគោលដៅដ៏ល្អ១

ជាការពិតណាស់ គោលដៅនៃការចេញរកស៊ីរបស់មនុស្សភាគច្រើន គឺដើម្បីលុយ​ ហើយភាពជោគជ័យនៃអាជីវកម្ម ធ្វើយ៉ាងណាឱ្យមានប្រាក់ចំណេញច្រើន តាមផ្លូវសុចរិត និងមានលទ្ធភាពទិញផ្ទះ ឡាន វីឡាបាន និងធ្វើឱ្យគ្រួសារមានសុភមង្គលតែប៉ុណ្ណោះ។ តែជាក់ស្តែង របស់សហគ្រិនស្ត្រីម្នាក់ ម្ចាស់ក្រុមហ៊ុន រិទ្ធ រ៉ានី ឯ.ក បានលើកឡើងថា ចេញរកស៊ីដំបូងៗ មិនគិតអ្វីច្រើននោះទេ ពោលធ្វើយ៉ាងម្តេចឱ្យអាជីវកម្មរីកចម្រើន ចំណេញច្រើន មានលុយគ្រប់គ្រាន់ទៅគឺបានហើយ តែដល់រកស៊ីយូរៗទៅ គោលដៅសំខាន់របស់អ្នករកស៊ី មិនមែនលុយទេ។

លោកស្រី ឡុង រ៉ានី ម្ចាស់ក្រុមហ៊ុន រិទ្ធ រ៉ារី ឯ.ក ផ្តោតសំខានលើគ្រឿងសំអាង និងសម្លៀកបំពាក់ មានប្រសាសន៍ប្រាប់ Business Cambodia ថា ដំបូងឡើង ចេញរកស៊ី គឺដើម្បីលុយសុទ្ធសាធ គ្មានគោលដៅអ្វីច្បាស់លាស់ទេ សំខាន់រកលុយឱ្យបានច្រើន ធ្វើឱ្យជីវភាពធូរធា ឈប់ក្រដូចពីមុនទៀតតែប៉ុណ្ណោះ។ តែតាមរយៈបទពិសោធន៍រកស៊ីយូរទៅ បែរជាផ្លាស់ប្តូរទស្សនៈរបស់ខ្លួន ដោយយល់ថា មិនត្រឹមតែដើម្បីខ្លួនឯងនោះទេ គឺចេញរកស៊ី ដើម្បីបុគ្គលិក និងដើម្បី​អតិថិជន។

និយាយត្រង់ចំណុច បុគ្គលិក សហគ្រិនស្ត្រីរូបនេះបានពន្យល់ថា មុនធ្លាប់​មានកំហុសច្រើនជាមួយបុគ្គលិក ដោយយល់ថា ក្នុងនាមជាបុគ្គលិកត្រូវតែធ្វើការឱ្យបានល្អ ត្រឹមត្រូវម៉ត់ចត់ និងមានលទ្ធផលដូចយើងរំពឹងទុក ហើយរបៀបធ្វើការក៏ត្រូវល្អឥតខ្ជោះ។ ខណៈដែលយើងមានចំណេះដឹងខ្ពស់ មានបទពិសោធន៍ការច្រើន ហើយបុគ្គលិកមានកម្រិតចំណេះដឹងតិចតួច គ្នាមិនសូវបានទទួលការអប់រំច្រើន ហើយបទពិសោធន៍ក៏មិនសូវច្រើន តែងបង្កើតកំហុស ហើយយើងស្តីឱ្យ ធ្វើឱ្យពួកគាត់ខ្លាចយើងខ្លាំង និងគោរពយើងដូចជាមេចឹង។

ផ្ទុយទៅវិញ ការចង់បានឱ្យគាត់ធ្វើនូវអ្វីដែលយើងចង់បាន ដឹងនាំរបៀបក្រុមហ៊ុន លទ្ធផលការងារ ឬការធ្វើការឱ្យអស់លទ្ធភាពមិនសូវបានល្អទៅវិញ។ ឥរិយាបថទាំងនេះ ត្រូវបានផ្លាស់ប្តូរទាំងស្រុង នៅពេលដែលស្វាមីលោកស្រីបានរៀបចំប្រព័ន្ធការងារឱ្យបុគ្គលិកធ្វើការ ពោលគឺលេងមានវប្បធម៌កូនចៅ និងមេ ឬម្ចាស់ក្រុមហ៊ុនទៀតហើយ មានតែពាក្យថាបងប្អូនតែប៉ុណ្ណោះ ហើយមនោសញ្ចេតនារវាងគ្នា កាន់តែមានជ្រៅៗឡើង ទឹកចិត្តធ្វើការកាន់តែខ្ពស់ ធ្វើការងារសំខាន់សម្រេចផែនការ រហូតជំរុញឱ្យអាជីវកម្មចេះតែរីកចម្រើនទៅៗ។

ពោលដោយទឹកមុខពោរពេញដោយមនោសញ្ចេតនា លាយឡំនឹងទឹកភ្នែក ដែលនឹកគិតដល់​ការលំបាករបស់បុគ្គលិក ដែលលោកស្រី ហៅថា បងប្អូនរួមការងារ ថា «ខ្ញុំពិតជាអាណិតដល់បងប្អូន(បុគ្គលិក)របស់ខ្ញុំខ្លាំងណាស់ ដែលធ្លាប់ស្តីឱ្យតាមចិត្តឆេឆាវពីមុន ដោយមិនសូវបានគិតពីហេតុផលច្រើន និងមិនសូវអត់អោន ហើយមិនសូវបានផ្តល់នូវអត្ថប្រយោជន៍ច្រើននោះទេ»។ តែដោយស្វាមីរបស់លោកស្រីចេះតែពន្យល់ច្រើន ឱ្យចេះចែករំលែកនូវអ្វីដែលយើងរកបានឱ្យទៅដល់ពួកគាត់ ពោលគឺបែកចែកផលចំណេញណាមួយនោះសម្រាប់ពួកគាត់ ឱ្យសាកសមនឹងការខិតខំប្រឹងប្រែង ហើយកុំត្រឹមទុកពួកគាត់ជាបុគ្គលិកធ្វើការ ហើយបើកប្រាក់ខែធម្មតា។

ត្រង់ចំណុចនេះ លោកស្រីបានសង្ងត់ធ្ងន់ថា ភាពជោគជ័យគ្រប់អាជីវកម្មទាំងអស់ បុគ្គលិកដែលលោកស្រីហៅថា បងប្អូន គឺ​ជាកត្តាសំខាន់ជំរុញឱ្យអាជីវកម្មទទួលបានជោគជ័យ។ ដឹកនាំដោយមនោសញ្ចេតនា ដឹកនាំដោយបេះដូង នោះ បុគ្គលិកពួកគាត់ធ្វើការមិនខ្លាចហត់នឿយនោះទេ ហើយលទ្ធផលការងារទទួលបានល្អ ច្រើនជាងឥរិយាបថក្រុមហ៊ុនបែកចែកមេ និងបុគ្គលិក។ ហើយវប្បធម៌បែបនេះ កម្រមានក្រុមហ៊ុនណាធ្វើបានណាស់។

បច្ចុប្បន្ននេះ លោកស្រីបានយកចិត្តទុកដាក់ជាមួយបុគ្គលិកខ្លាំងណាស់ បានផ្តល់​កន្លែងស្នាក់នៅ អាហារ តែងបង្កើតកម្មវិធីជប់លៀងផ្សេងៗ និងដំណើរកម្សាន្ត ដើម្បីឱ្យពួកគាត់មានភាពកក់ក្តៅ ថានេះមិនត្រឹមតែជាក្រុមហ៊ុនទេ តែជាគ្រួសារមួយដ៏កក់ក្តៅដែលយើងប្រឹងធ្វើការទៅ និងទទួលបានផល​ប្រយោជន៍មកដោយពេញចិត្ត។

រឺតតែពិសេសទៀតនោះ លោកស្រីតែង​បណ្តុះបណ្តាលបុគ្គលិកឱ្យស្រឡាញ់គ្នាដូចជាបងប្អូន និងបានឱ្យរៀននៅវគ្គបណ្តុះបណ្តាលនានា ដើម្បីឱ្យពួកគាត់កាន់តែមានចំណេះដឹង និងជំនាញ រៀននូវអ្វីដែលថ្មីៗថែមទៀត។ ហើយបានបើកឱកាសឱ្យពួកគាត់ បង្កើនចំណូលឱ្យបានច្រើន និងជំរុញឱ្យពួកគាត់រៀនវិនិយោគទៀតផង។ ហើយមានបុគ្គលិកមួយចំនួនមានលទ្ធភាពទិញដីដោយខ្លួនឯងបាន។

ភាពរីកចម្រើន និងផ្លែផ្ការបស់បុគ្គលិក ឬបងប្អូនទទួលបាន លោកស្រី និងស្វាមីពិតជាសប្បាយចិត្តខ្លាំង ជាងជោគជ័យរបស់ខ្លួនឯងទៅទៀត។ ហើយនៅថ្ងៃអនាគតក្រុមហ៊ុនមួយនេះ អាចនឹងក្លាយជាផ្ទះដ៏កក់ក្តៅសម្រាប់បុគ្គលិក មិនមែនត្រឹមម្ចាស់ក្រុមហ៊ុននោះទេ។ នៅកំឡុងឆ្នាំ២០២០ លោកស្រីត្រៀមជ្រើសរើសយកបុគ្គលិកឱ្យបាន១០០នាក់ថែមទៀត និងពង្រីកអាជីវកម្មកាន់តែធំជាងមុន។

ចំណែកកក្តាសំខាន់មួយទៀត ដែលជំរុញឱ្យអាជីវកម្មជោគជ័យនោះ គឺលោកស្រីរកស៊ីមិនផ្តោតសំខាន់លើលុយនោះទេ ពោលគឺ​ភាពស្មោះត្រង់ គុណតម្លៃ និង​អត្ថប្រយោជន៍ដល់​អតិថិជន។ តាមរយៈបទពិសោធន៍រកស៊ី មានឱកាសច្រើនក្នុងការ​រកប្រាក់ចំណេញច្រើន ហើយលឿនពីអាជីវកម្មអនឡាញរបស់ខ្លួន ដោយទុច្ចរិត តែលោកស្រីនៅរក្សាជំហររឹងមាំ ពោលគឺមានភាពស្មោះត្រង់ជាមួយអតិថិជនជានិច្ច មិនបោកប្រាក់ មិនកេងចំណេញ(ឆកឱកាសមិនល្អ)ឡើយ។

ការកសាងភាពស្មោះត្រង់ លក់តែរបស់មានគុណភាពល្អដល់អ្នកប្រើប្រាស់ ជំរុញឱ្យអាជីវកម្មលោកស្រីថែរក្សាបាននូវអតិថិជនចាស់ៗជាច្រើន ហើយបង្កើតនូវអតិថិជនថ្មីថែមទៀត ដែលជាចំណុចពិសេសមួយរបស់អាជីវកម្មមានសេ្ថរភាព និងរីកចម្រើនទៅមុខ។

សូមបញ្ជាក់ថា រំលឹងដល់ការចេញរកស៊ីដំបូង លោកស្រីត្រឹមជាអ្នកលក់អនឡាញធម្មតា ក្រៅពីការងារពេញម៉ោងតែប៉ុណ្ណោះ តែដល់ពេលអាជីវកម្មវិស័យនេះ រីកចម្រើន ក៏សម្រេចចិត្តឈប់ធ្វើការពីធនាគារ ចាប់អាជីវកម្មអនឡាញ ផ្តើមពីដើមទុន៦០០ដុល្លារ រួមទាំងខ្ចីមិត្តភក្តខ្លះផង ហើយមានបុគ្គលិកត្រឹម៣នាក់ប៉ុណ្ណោះ ដល់ពេលបច្ចុប្បន្ននេះ ដោយសារក្រុមរីកចម្រើនបុគ្គលិកបានកើនឡើងដល់៣៦នាក់ ហើយគ្រោងពង្រីកអាជីវកម្ម និងត្រៀមជ្រើសរើសបុគ្គលិកឱ្យបាន១០០នាក់ក្នុងកំឡុងឆ្នាំ២០២០។ សម្រាប់អាជីវកម្មមួយរីកចម្រើនទៅបានវាអាស្រ័យលើកត្តាសំខាន់ៗច្រើន តែសម្រាប់អាជីវកម្មអនឡាញរបស់លោកស្រីគឺមានការរួមចំណែកពីបុគ្គលិក ស្វាមីរបស់លោកស្រី និងការខិតខំប្រឹងប្រែងរបស់លោកស្រីផ្ទាល់ទើបមានថ្ងៃនេះ។ ហើយកុំចេញរកស៊ី ដើម្បីតែលុយ បើយើងអតា្មនិយមពេកអាជីវកម្មយើងរីកចម្រើនតែរយៈពេលខ្លី តែមិនយូរអង្វែងទេ បើបានដឹកនាំបុគ្គលិកដោយបេះដូង និងមនោសញ្ចេតនាទៀត នោះអាជីវកម្មកាន់តែរីកច្រើនខ្លាំង៕

អត្ថបទដោយ៖ ម៉ន វុទ្ធា  Email: [email protected],Facebook:Morn Vuthea

អ្នកនិពន្ធសៀវភៅ«សហគ្រិនអចលនទ្រព្យជំនាន់ថ្មី»

ដើម្បីទទួលបានព័ត៌មានកាន់តែលឿន និងច្បាស់លាស់អំពីការធ្វើជំនួញឫអាជីវកម្មថ្មីៗ ប្លែកៗសូមធ្វើការទាញយកកម្មវិធីថ្មីរបស់ Business Cambodia ដូចខាងក្រោម៖

សម្រាប់អ្នកប្រើប្រាស់ Android: https://play.google.com/store/apps/details?id=com.businesscambodia.app

សម្រាប់អ្នកប្រើប្រាស់ IOS: https://apps.apple.com/kh/app/business-cambodia-app/id1460967958

ទំនាក់ទំនងផ្នែកផ្សព្វផ្សាយពាណិជ្ជកម្ម៖ ០១៧/០៩៣ ៣០០ ៧៥៥

តើលោកអ្នកពេញចិត្តអត្ថបទមួយនេះទេ?​សូមចូលរួមផ្តល់មតិកែតម្រូវ!

RELATED ARTICLES