អ្នករកស៊ីថ្មីថ្មោងបើចង់ចាប់យកទីផ្សារពីអ្នកចាស់បានរហ័ស គួរមកមើលក្បួនរកស៊ីពីយីហោមួយនេះ​

កាលពី៥ឆ្នាំមុនអ្នកប្រហែលជាមិនធ្លាប់បានឮក្រុមហ៊ុនស្មាតហ្វូន Huawei នៅឡើយទេ ប៉ុន្តែមួយរយៈចុងក្រោយនេះយើងមើលឃើញថាក្រុមហ៊ុនមួយនេះបានហោះជំហានឈានជើងទៅមុខយ៉ាងលឿន ហើយត្រូវបានគេចាត់ទុកថាជាក្រុមហ៊ុនយក្សនៅក្នុងពិភពស្មាតហ្វូនកំពូលៗនៅលើពិភពលោកថែមទៀតផង។យីហោនេះត្រូវបានគេស្គាល់ទូទាំងពិភពលោក ថាជាកំពូលស្មាតហ្វូនដែលអាចដណ្តើមយកទីផ្សាររបស់យីហោចាស់បានយ៉ាងលឿនស្ទើរមិនគួរឲ្យជឿ។ហើយនៅពីក្រោយភាពជោគជ័យនេះផងដែរ មានមេរៀននិងក្បួនរកស៊ីល្អៗជាច្រើនដែលអ្នករកស៊ីថ្មីថ្មោងនៅស្រុកខ្មែរគួរតែរៀនសូត្រពីស្ថាបនិកនៃយីហោមួយនេះ ក្បួនរកស៊ីទាំងនោះរួមមាន ៖

១.ផ្តោតលើការផ្សព្វផ្សាយ៖ សម្រាប់ក្រុមហ៊ុន Huawei មិនសូវចាប់អារម្មណ៍លើការផលិតស្មាតហ្វូនថ្មីៗច្រើនហូរហែនោះឡើយ តែវាផ្តោតសំខាន់លើការបង្កើនការផ្សព្វផ្សាយម៉ាកយីហោរបស់ខ្លួនឲ្យបានច្រើន ដោយការឃោសនាជាច្រើនដើម្បីចាប់យកទីផ្សារពីអ្នកចាស់បន្តិចម្តងៗដោយធ្វើការសហការជាមួយដៃគូរបស់ខ្លួននៅតាមប្រទេសនានាឬទីតាំងណាមួយដែលជាគោលដៅរបស់ខ្លួន។

២.អ្នកផ្សព្វផ្សាយ៖ សម្រាប់យីហោមួយនេះតែងតែជ្រើសយកអ្នកផ្សព្វផ្សាយជាតារាល្បីៗជាក់ស្តែងយុទ្ធនាការសម្រាប់ស្មាតហ្វូន P9 ក្រុមហ៊ុននេះបានយក Henry Cavill និង Scarlett Johansson ជាអ្នកផ្សព្វឲ្យម៉ាករបស់ខ្លួន។ហើយនៅក្នុងការជ្រើសយកតារាល្បីៗមកបង្ហាញនេះ គឺត្រូវជ្រើសយកតារាដែលជាអ្នកដែលមានការគាំទ្រ ស្រឡាញ់ចូលចិត្តច្រើនពីអតិថិជន ដើម្បីធានាថានៅពេលផ្សាយចេញទៅមានអ្នកមើលនិងមានអ្នកចាប់អារម្មណ៍ច្រើន។

៣.ការតាំងបង្ហាញ៖ វាគឺជាការបើកឱកាសសម្រាប់អតិថិជនអាចសាកល្បងប្រើដើម្បីមើលអំពីគុណភាពរបស់ផលិតផលរបស់ខ្លួន តាមរយៈការប៉ះផ្ទាល់ មើលដោយផ្ទាល់តែម្តង។ហើយក្រៅពីគោលដៅនេះ Huawei ក៏បានអនុវត្តនូវយុទ្ធសាស្រ្តទាក់ទាញអតិថិជននៅពេលធ្វើការតាំងពិព័រណ៍នោះផងដែរ ព្រោះវាជាពេលដែលមានអ្នកចូលទស្សនាច្រើនជាងពេលណាទាំងអស់ ហេតុនេះពួកគេត្រូវយកចិត្តទុកខ្លាំងនៅកំឡុងពេលនោះ។

៤.បង្ហាញនៅលើបណ្តាញសង្គម៖ ដោយសារតែសម័យនេះភាពជឿនលឿននៅក្នុងបណ្តាញសង្គមមានភាពទូលំទូលាយហេតុនេះហើយទើប ក្រុមហ៊ុន Huawei ធ្វើការផ្សព្វផ្សាយផលិតផលរបស់ខ្លួនក៏ដូចជាកម្មវិធីនានាតាមបណ្តាញសង្គមដោយអមជាមួយរូបភាពនិងវីដេអូជាច្រើនសម្បូរបែប។

៥.ផ្ទាំងផ្សព្វផ្សាយ៖ សម្រាប់ក្រុមហ៊ុនស្មាតហ្វូននេះ បានជ្រើសយកការផ្សព្វផ្សាយដ៏ល្អមួយគឺការធ្វើផ្ទាំងពាណិជ្ជកម្មនៅតាមទីតាំងធំៗដែលមានមនុស្សឆ្លងកាត់ច្រើន ឬក៏ការដាក់នៅតាមទីលានបាល់ទាត់របស់ប្រទេសដែលល្បីល្បាញជាដើម។សម្រាប់ការផ្សព្វផ្សាយតាមរយៈផ្ទាំងពាណិជ្ជកម្មត្រូវបានជនជាតិចិនចាត់ទុកថាជាការផ្សាយដែលអាចជោគជ័យបានខ្ពស់ជាងគេ៕

អត្ថបទដោយ៖សម្បត្តិ សុខឡាង

Online

តើលោកអ្នកពេញចិត្តអត្ថបទមួយនេះទេ?​សូមចូលរួមផ្តល់មតិកែតម្រូវ!

RELATED ARTICLES