ប្រជាជនអាមេរិកដណ្ដើមគ្នាដេញថ្លៃទិញម៉ាស់ជាង ៧៥០,០០០ ខណៈ COVID-19 ផ្ទុះកាន់តែខ្លាំង

យោងតាមការចុះផ្សាយរបស់សារព័ត៌មាន Bloomberg កាលពីថ្ងៃពុធម្សិលមិញនេះ បានឱ្យដឹងថា ខណៈពេលដែលជំងឺឆ្លង COVID-19 កំពុងតែបន្ដរីករាលដាលកាន់តែខ្លាំងឡើងនោះ ប្រជាជននៅក្នុងរដ្ឋ Texas សហរដ្ឋអាមេរិក បានធ្វើការដណ្ដើមគ្នាដេញថ្លៃទិញម៉ាស់ជាង ៧៥០,០០០​ ម៉ាស់ដោយមិនស្តាយលុយ។ ការដេញថ្ងៃនេះ ត្រូវបានប្រារព្ធឡើងនៅលើអនឡាញ នៅក្នុងវេបសាយមួយដែលមានឈ្មោះថា auctionsunlimitedllc.com ។

ប្រភពព័ត៌មានដដែល បានឱ្យដឹងទៀតថា នៅក្នុងម៉ាស់មួយប្រអប់មានចំនួន ១៦ម៉ាស់ ត្រូវបានដាក់ឱ្យដេញថ្លៃចាប់ពីតម្លៃ ១៧០ដុល្លារឡើងទៅ ខណៈពេលដែលពីមុន ម៉ាស់មួយមានតម្លៃត្រឹមតែ ៣ដុល្លារប៉ុណ្ណោះ កាលពីពេលមិនទាន់មានការផ្ទុះឡើងនូវជំងឺឆ្លង COVID-19 ។

ក្រោយពីការដេញថ្លៃអស់រយៈពេលមួយសប្តាហ៍ ដែលបានបញ្ចប់កាលពីថ្ងៃអង្គារកន្លងទៅថ្មីៗនេះ លោក Tim Worstell ដែលជាម្ចាស់វេបសាយ បានបង្ហើបឱ្យដឹងថា ផលិតផលទាំងអស់មិនមែនជារបស់លោកនោះទេ លោកគ្រាន់តែទទួលយកផលិតផលទាំងនោះពីក្រុមហ៊ុនធំមួយ (មិនបញ្ចេញឈ្មោះ) យកមកដាក់ឱ្យដេញថ្លៃនៅលើវេបសាយរបស់លោកតែប៉ុណ្ណោះ ហើយលោកនឹងទទួលបានប្រាក់កម្រៃជើង (commission)  ពីក្រុមហ៊ុននោះ។ 

លោកបានបន្ថែមថា ការដាក់ឱ្យដេញថ្លៃលើកនេះ អាចទាញចំណូលពីការលក់បានប្រមាណជា ១៥៤,០០០ដុល្លារ ហើយលោកទទួលបានប្រាក់ commission រហូតដល់ទៅជាង ៤០,០០០ដុល្លារឯណ្ណោះ។

គួរបញ្ជាក់ថា ក្នុងអំឡុងពេលមានការផ្ទុះឡើងនូវជំងឺឆ្លង COVID-19 នេះ ប្រជាជនអាមេរិក បាននាំគ្នាសម្រុកទិញអីវ៉ាន់ ដើម្បីស្ដុកទុកនៅក្នុងផ្ទះយ៉ាងគំហុគ។ ដោយនៅតាមបណ្ដាហាងលក់ទំនិញ ផ្សារទំនើបផ្សេងៗ បានអស់អីវ៉ាន់សម្រាប់លក់ ហើយសូម្បីតែក្រុមហ៊ុនធំៗ Amazon និង Walmart ក៏មានការខ្វះខាតផលិតផលសម្រាប់ផ្គត់ផ្គង់ដល់អតិថិជនរបស់ខ្លួនផងដែរ។ ដោយហេតុនេះ ហើយទើបធ្វើឱ្យទំនិញកាន់តែឡើងថ្លៃមួយទ្វេជាពីរ ៕ 

អត្ថបទដោយ៖ ម៉ម ណាវ៉ាសិរិ (Start-Up Writer)

 

Sathapanabank Online

តើលោកអ្នកពេញចិត្តអត្ថបទមួយនេះទេ?​សូមចូលរួមផ្តល់មតិកែតម្រូវ!

RELATED ARTICLES