កាលពីអត្ថបទមុនលោក ឃុន​​ ដារិទ្ធ​ Managing Partner របស់ក្រុមហ៊ុន K Professional Accountants បានផ្តល់គន្លឹះសំខាន់ៗ​ជូនដល់​​ម្ចាស់អាជីវកម្ម ក្នុងការអនុវត្ត​កាតព្វកិច្ចគណនេយ្យ និងសវនកម្ម។ លោក ដារិទ្ធ បានផ្តល់អនុសាសន៍គន្លឺះថា ចាប់ពីពេលនេះតទៅ ម្ចាស់អាជីវកម្មទាំងអស់ គួរចាប់ផ្តើមរៀបចំខ្លួនឱ្យបានល្អប្រសើរ ប្រកបដោយចក្ខុវិស័យ​វែងឆ្ងាយ​​ ដើម្បីឱ្យអាជីវកម្មរបស់ខ្លួនមានបញ្ជីការគណនេយ្យត្រឹមត្រូវនិងរបាយការណ៍ហិរញ្ញវត្ថុដែលអាចជឿទុកចិត្តបាន និងទាន់ពេលវេលាដែលត្រូវធ្វើការសម្រេចចិត្តវិនិយោគ ទៅលើផែ្នកគន្លឺះសំខាន់ៗ និងអាទិភាពឱ្យបានលឿន។

តាមច្បាប់ គណនេយ្យ និងសវនកម្មក្រុមហ៊ុនមានកាតព្វកិច្ច ក្នុងការកាន់កាប់ បញ្ជីការគណនេយ្យត្រឹមត្រូវ។​ បញ្ជីការគណនេយ្យដែលត្រឹមត្រូវ​ រួមមាន ព័ត៌មានគណនេយ្យ សក្ខីប័ត្រចុះបញ្ជី​ (Voucher) ​ឯកសារគណនេយ្យ (Invoices, Receipts, Contracts, Pay Slips, និង ឯកសារគតិយុត្តនានា) សៀវភៅធំ(General Ledger) ព្រមទាំង ប្រព័ន្ធកត់ត្រាចាំបាច់នានា ដែលគំាទ្រក្នុងការរៀបចំរបាយការណ៍ហិរញ្ញវត្ថុដែលអាចជឿទុកចិត្តបាន ។

ដើម្បីមាន បញ្ជីការគណនេយ្យត្រឹមត្រូវម្ចាស់អាជីវកម្មត្រូវធ្វើការរៀបចំ ប្រព័ន្ធគណនេយ្យអោយបានល្អនិងមាន ប្រសិទ្ធភាព។​ ប្រព័ន្ធគណនេយ្យ​​ មានតួនាទីសំខាន់ណាស់ សំរាប់អាជីវកម្ម ដើម្បីឱ្យ មានបញ្ជីការគណនេយ្យត្រឹមត្រូវនិងរបាយការណ៍ហិរញ្ញវត្ថុដែលអាចជឿទុកចិត្តបាន និងទាន់ពេលវេលា។

នៅក្នុងអត្ថបទនេះលោក ឃុន ដារិទ្ធ នឹងផ្តល់ចំណេះដឹងអំពី ការរៀបចំប្រព័ន្ធគណនេយ្យ អោយបានត្រឹមត្រូវនិង​មានប្រសិទ្ធភាព។ អ្នកវិជ្ជាជីវៈបានផ្តល់ជូនវិធីសាស្រ្តគន្លឺះក្នុងការរៀបចំប្រព័ន្ធគណនេយ្យ ដែលមាន​ប្រសិទ្ធភាព ដូចខាងក្រោម:

• ក្រុមហ៊ុនត្រូវចាប់ផ្តើមរៀបចំអោយមានគោលនយោបាយ និងនីតិវិធីគណនេយ្យអោយបានត្រឹមត្រូវ ដែលសំដៅទៅដល់ការរៀបចំនូវនីតិវិធីនានាសម្រាប់គ្រប់គ្រងការងារគណនេយ្យ ការងារហិរញ្ញវត្ថុក៏ដូចជា សំដៅទៅលើការគ្រប់គ្រងផ្ទៃក្នុងទាំងមូល
• រៀបចំ ប្លង់គណនី(Chart Accounts )
• រៀបចំ លេខកូដវិភាគគណនី(Account Analysis Codes)
• រៀបចំប្រព័ន្ធ សក្ខីប័ត្រចុះបញ្ជី​ (Voucher) នឹង​​​ សៀវភៅធំ
• រៀបចំអោយមានប្រព័ន្ធនៃការធានាទៅលើការផ្តល់ឯកសារគាំទ្រត្រឹមត្រូវ (Supporting Documents)
• រៀបចំ ប្រព័ន្ធ​រក្សាឯកសារ (Filling System)
• រៀបចំអោយមានការត្រួតពិនិត្យទៅលើព័ត៌មានអោយបានត្រឹមត្រូវ
• រៀបចំបញ្ជីការនិងការគ្រប់គ្រង សារពើភ័ណ្ឌ (Inventory)
• រៀបចំបញ្ជីការនិងការគ្រប់គ្រង ទ្រព្យសកម្ម (Fixed Assets)
• រៀបចំប្រព័ន្ធនៃការគ្រប់គ្រងសាច់ប្រាក់ក្នុងធនាគារ ក៏ដូចជាសាច់ប្រាក់នៅក្នុងដៃ (Cash Management) 
• រៀបចំប្រព័ន្ធ គ្រប់គ្រង គណនីត្រូវទទួល និង​ គណនីត្រូវបង់
• រៀបចំបញ្ជីការនិងការគ្រប់គ្រង ទ្រព្យ និង បំណុលផ្សេងៗទៀត
• រៀបចំប្រព័ន្ធ ពិនិត្យ និង អនុម័តរបាយការណ៍

លោក ឃុន​ ដារិទ្ធបានលើកទឹកចិត្ត អោយសហគ្រាស​ និង​អង្គភាព ចាប់ផ្តើមគិតគូរ និង​ផ្តល់អាទិភាព ក្នុងការរៀបចំ ប្រព័ន្ធគណនេយ្យ អោយបានត្រឹមត្រូវដោយចាប់ផ្តើមធ្វើនូវរាល់​ចំនុចខាងលើ​ ម្តងបន្តិចៗ​។ លោកបន្ថែមថា ពេលវេលា សំខាន់ណាស់ សំរាប់ម្ចាស់អាជីវកម្មទាំងអស់ ក្នុងការរៀបចំខ្លួន ប្រសិនបើសហគ្រាស មិន​ប្រើពេលវេលានេះសម្រាប់រៀបចំខ្លួនទេ អាជីវកម្ម អាចនឹងមានទណ្ឌកម្ម និងហានិភ័យនានាដែលកើតមានពី អនុលោមភាព ច្បាប់ស្តីពី គណនេយ្យ និងសវនកម្ម។

លោក ដារិទ្ធបាន​បន្ថែមថាការរៀបចំខ្លួននេះ​នឹង​ជួយ​ ម្ចាស់អាជីវកម្មទាំងអស់ ធានាការអនុលោមតាមច្បាប់ គណនេយ្យ និងសវនកម្ម ពេញលេញ ដោយសារតែ បញ្ជីការគណនេយ្យ​ និង របាយការណ៍ហិរញ្ញវត្ថុ​ អនុលោមតាមស្តង់ដារគណនេយ្យជាធរមាន(CFIRSs ឬ CIFRS for SMEs)  ត្រូវការពេលវេលា និង ការខិតខំប្រឹងប្រែងជាច្រើនដើម្បីរៀបចំ។​ 

លោកដារិទ្ធរីករាយសម្រាប់សំណួរទាក់ទងនឹងប្រធានបទ ខាងលើ​ សូមទាក់ទង:

ជាន់ទី៥ អគារ ស៊ីភីអិល កាច់ជ្រុងផ្លូវ ៣៤៨ និងផ្លូវ ២០៥ សង្កាត់ទួលស្វាយព្រៃ២ ខណ្ឌចំការមន ភ្នំពេញ ។

Phone: 012 444 799/078 345 888 

Email: [email protected]

លោកដារិទ្ធក៏សូមជូនពរដល់ម្ចាស់អាជីវកម្មទទួលបានជោគជ័យដើម្បីកសាងគ្រឹះសេដ្ឋកិច្ចរបស់ប្រទេសកម្ពុជា។