កាលពីអត្ថបទលើកមុន លោក ដារិទ្ធ បានផ្តល់អនុសាសន៍គន្លឺះថា ចាប់ពីពេលនេះតទៅ ម្ចាស់អាជីវកម្មទាំងអស់ គួរចាប់ផ្តើមរៀបចំខ្លួនឱ្យបានល្អប្រសើរ ប្រកបដោយចក្ខុវិស័យ​វែងឆ្ងាយ​​ ដើម្បីឱ្យអាជីវកម្មរបស់ខ្លួនមានបញ្ជិការគណនេយ្យត្រឹមត្រូវនិងរបាយការណ៍ហិរញ្ញវត្ថុដែលអាចជឿទុកចិត្តបាន និងទាន់ពេលវេលាដែលត្រូវធ្វើការសម្រេចចិត្តវិនិយោគ ទៅលើផែ្នកគន្លឺះសំខាន់ៗ និងអទិភាពឱ្យបានលឿន:

១) វិនិយោគលើបុគ្គលិកគណនេយ្យ ដែលមានសមត្ថភាព និងគុណភាព

២) វិនិយោគលើ ប្រព័ន្ធគណនេយ្យ (Accounting Software) ដែលមានប្រសិទ្ធិភាព

៣)  រៀបចំប្រព័ន្ធ និង គោលនយោបាយគណនេយ្យ (Chart of Accounts and Accounting Policies) 

៤) ក៏ដូចជាដាក់របាយការណ៍ហិរញ្ញវត្ថុឱ្យរងសវនកម្មក្រុមហ៊ុន​ស្ថិតនៅក្នុងលក្ខណៈវិនិច្ឆ័យនៃប្រកាសស្តីពី ​កាតព្វកិច្ច​ដាក់របាយការណ៍ហិរញ្ញវត្ថុឱ្យរងសវនកម្មឯករាជ្យ ចុះថ្ងៃទី ១០ ខែ កក្កដា ឆ្នាំ ២០២០។

លោកបន្ថែមផងដែរថា ម្ចាស់អាជីវកម្ម គួរចាប់ផ្តើមស្វែងរកជំនួយពីអ្នកជំនាញដើម្បីជួយអាជីវកម្ម មានរបាយការណ៍ហិរញ្ញវត្ថុ អាចជឿទុកចិត្តបាន និងទាន់ពេលវេលា អនុលោមបានតាមច្បាប់ស្តីពី គណនេយ្យ និងសវនកម្ម និងពន្ធដារ ដែលធានាបាននូវភាពជោគជ័យក្នុងការគ្រប់គ្រងអាជីវកម្ម ជៀសផុតពីទណ្ឌកម្ម និងហានិភ័យនានាដែលកើតមានឡើងក្នុងអាជីវកម្ម ។

ក្នុងអត្ថបទនេះ លោក ដារិទ្ធ បានពន្យល់ ពីអនុក្រឹត្យលេខ៧៩ អនក្រ.បក ចុះថ្ងៃទី១ ខែមិថុនា ឆ្នាំ២០២០ ស្តីពីពិន័យ​អន្តរការណ៍​ចំពោះអំពើល្មើសទៅនឹងច្បាប់ស្តីពីគណនេយ្យ និងសវនកម្ម និងសារាចរណែនាំស្ដីពី ការពន្យារពេលការអនុវត្តការពិន័យអន្តរការណ៍ចំពោះអំពើល្មើសទៅនឹងច្បាប់ស្តីពីគណនេយ្យ និងសវនកម្ម ចុះថ្ងៃទី១១ ខែកញ្ញា ឆ្នាំ២០២០ ក្នុងគោលបំណង​ទុកលទ្ធភាព​និងពេល​វេលា​ឱ្យបានគ្រប់គ្រាន់ដល់វិស័យ​ឯកជនក្នុងការកែប្រែផ្លាស់ប្តូរ កម្មវិធីគណនេយ្យ នឹង​ រៀបចំខ្លួន ​ដើម្បីអនុវត្តតាមច្បាប់គណនេយ្យ និងសវនកម្ម។

សារាចរណែនាំស្ដីពី ការពន្យារពេលការអនុវត្តការពិន័យអន្តរការណ៍ចំពោះអំពើល្មើសទៅនឹងច្បាប់ស្តីពីគណនេយ្យ និងសវនកម្ម ចុះថ្ងៃទី១១ ខែកញ្ញា ឆ្នាំ២០២០ នេះគឺពន្យារពេលអនុវត្តអនុក្រឹត្យលេខ៧៩ អនក្រ.បក ចុះថ្ងៃទី១ ខែមិថុនា ឆ្នាំ២០២០ ស្តីពីពិន័យអន្តរការណ៍​ ចំពោះអំពើល្មើសទៅនឹងច្បាប់ស្តីពីគណនេយ្យ និងសវនកម្ម ចំពោះ​តែសហគ្រាស​ឬនីតិបុគ្គល​ដែលបាន​ចុះ​បញ្ជី​នៅក្រសួងពាណិជ្ជកម្ម និង/ឬនៅអគ្គនាយកដ្ឋានពន្ធដារ​ជាសហគ្រាសអ្នកជាប់ពន្ធធំ និង​សហគ្រាស​អ្នកជាប់ពន្ធមធ្យមនិងអង្គភាព​​មិនស្វែង​រក​ប្រាក់​ចំណេញ ដែល​បានចុះបញ្ជីនៅក្រសួង និង​ស្ថាប័ន​ជំនាញ រយៈពេល ១ (មួយ) ឆ្នាំ ដោយគិតចាប់ពី​កាលបរិច្ឆេទ​ចេញសារាចរណែនាំនេះ តទៅ។ 

តាមខ្លឹមសារនៃសារាចរណែនាំ ​សហគ្រាសដែលទទួលបានការពន្យារតាមសារាចរណ៍ណែ​នាំនេះនឹងទទួលពន្យារពេលអនុវត្តអនុក្រឹត្យលេខ៧៩ អនក្រ.បក ចុះថ្ងៃទី១ ខែមិថុនា ឆ្នាំ២០២០ ស្តីពីពិន័យអន្តរការណ៍​ ចំពោះអំពើល្មើសទៅនឹងច្បាប់ស្តីពីគណនេយ្យ និងសវនកម្ម រយៈពេល ១ (មួយ) ឆ្នាំ ដោយគិតចាប់ពី​កាលបរិច្ឆេទ​ចេញសារាចរណែនាំ ប៉ុន្តែមិនមែនពន្យារពេលការអនុវត្តតាមច្បាប់គណនេយ្យ និងសវនកម្ម នោះទេ។

ដូចនេះ ក្រុមហ៊ុនមានកាតព្វកិច្ចក្នុងការរៀបចំខ្លួនឱ្យបានរួចជាស្រេច ដែលរួមមាន ការរៀបចំប្រព័ន្ធគណនេយ្យ (Accounting Software) ដែលមានប្រសិទ្ធិភាព ការរៀបចំប្រព័ន្ធ និង គោលនយោបាយគណនេយ្យ (Chart of Accounts and Accounting Policies) និងការបណ្តុះ​បណ្តាលបុ​គ្គ​លិក​របស់ខ្លួនដែលមានសមត្ថភាព និងគុណភាព ដើម្បីត្រៀម​លក្ខណៈ​ក្នុងការអនុវត្ត​ច្បាប់និង​វិធាន​ពាក់ព័ន្ធ​ឱ្យមាន​ប្រសិទ្ធភាព​និងសក្តិ​សិទ្ធ​ភាព​ ដើម្បីជៀសផុតពីទណ្ឌកម្ម និងហានិភ័យនានាដែលកើតមានឡើងក្នុងអាជីវកម្ម។ 

លោកដារិទ្ធ បានផ្តល់អនុសាសន៍គន្លឺះថា ម្ចាស់អាជីវកម្មទាំងអស់ គួរចាប់ផ្តើមរៀបចំខ្លួន ឥឡូវនេះ ឱ្យបានល្អប្រសើរ នឹង ផ្តោតទៅលើផែ្នក  គន្លឺះសំខាន់ៗ នឹងអទិភាពដូចខាងក្រោម:

១) រៀបចំរបាយការណ៍ហិរញ្ញវត្ថុ​​ ឆ្នាំ2020 ជាភាសាខែ្មរអនុលោមតាមស្តង់ដារគណនេយ្យជាធរមាន(CFIRSs ឬ CIFRS for SMEs)

២) ពិនិត្យប្រព័ន្ធគណនេយ្យនឹង បញ្ជីការគណនេយ្យ​ដែលមានភាសាខែ្មរ

៣) រៀបចំដាក់ របាយការណ៍ហិរញ្ញវត្ថុ​​ ឆ្នាំ2020 ជាភាសាខែ្មរ ឱ្យរងសវនកម្ម

គាត់​បាន​បន្ថែមថាការរៀបចំខ្លួនេះ​នឹង​ជួយ​ ម្ចាស់អាជីវកម្មទាំងអស់ ធានាការអនុលោមតាមច្បាប់ គណនេយ្យ និងសវនកម្ម ពេញលេញ ដោយសារតែ បញ្ជីការគណនេយ្យ​ នឹង របាយការណ៍ហិរញ្ញវត្ថុ​ អនុលោមតាមស្តង់ដារគណនេយ្យជាធរមាន(CFIRSs ឬ CIFRS for SMEs)  ត្រូវការពេលវេលាច្រើន និង ការខំប្រឹងប្រែងជាច្រើនដើម្បីរៀបចំ។​ ការរៀបចំរបាយការណ៍ហិរញ្ញវត្ថុ​ អនុលោមតាមស្តង់ដារគណនេយ្យ ​លើកទីមួយ (First-time adoption of Cambodian International Financial Reporting Standards) តម្រូវអោយ​ក្រុមហ៊ុន មានរបាយការណ៍ហិរញ្ញវត្ថុ​ ពីរ​ បី ឆ្នាំសារពើពន្ធ ដើម្បីធ្វើ CIFRS Conversion ។

ការធ្វើសវនកម្មរបាយការណ៍ហិរញ្ញវត្ថុ​​ ឆ្នាំ2020 តម្រូវអោយ​ក្រុមហ៊ុន មានរបាយការណ៍ហិរញ្ញវត្ថុអនុលោមតាមស្តង់ដារគណនេយ្យប្រព័ន្ធគណនេយ្យដែលមានប្រសិទ្ធិភាព បញ្ជីការគណនេយ្យ​ ត្រឹមត្រូវ នឹង ឯកសារគាំទ្ររឹងមាំ។

លោក ដារិទ្ធ បន្ថែមថា ពេលវេលា សំខាន់ណាស់ សំរាប់ម្ចាស់អាជីវកម្មទាំងអស់ក្នុងការរៀបចំខ្លួន ប្រសិនបើសហគ្រាស មិន​ប្រើពេលវេលានេះសម្រាប់រៀបចំខ្លួនទេ អាជីវកម្ម អាចមានទណ្ឌកម្ម និងហានិភ័យនានាដែលកើតមានពី អនុលោមភាព ច្បាប់ស្តីពី គណនេយ្យ និងសវនកម្ម។

លោកដារិទ្ធថាលោករីករាយសម្រាប់សំណួរ ទាក់ទងប្រធានបទ ខាងលើ​ សូមទាក់ទង:

ជាន់ទី៥ អគារ ស៊ីភីអិល កាច់ជ្រុងផ្លូវ ៣៤៨ និងផ្លូវ ២០៥ សង្កាត់ទួលស្វាយព្រៃ២ ខណ្ឌចំការមន ភ្នំពេញ ។

Phone: 012 444 799 : 078 345 888 Email: [email protected]

លោកដារិទ្ធក៏សូមជូនពរដល់ម្ចាស់អាជីវកម្មទទួលបានជោគជ័យដើម្បីកសាងគ្រឹះសេដ្ឋកិច្ចរបស់ប្រទេសកម្ពុជា។