យុទ្ធសាស្ត្ររកស៊ីបែបពីងពាង របស់«ជីប ម៉ុង» ដើម្បីពង្រីកជំនួញបានច្រើនផ្តើមចេញពី១

ក្រុមហ៊ុនជីប ម៉ុង គ្រុប បានក្តោបក្តាប់ជំនួញមហាសាលនៅកម្ពុជា ដែលមានក្រុមហ៊ុនជាបុត្រសម្ព័ន្ធកំពុងរកស៊ីនៅលើវិស័យសក្តានុពលសំខាន់ៗ មានសំណង់ អចលនទ្រព្យ ផ្សារទំនើប សណ្ឋាគារ វិស័យម្ហូបអាហារ ផលិតចំណីសត្វ ធនាគារជាដើម។ ភាពជោគជ័យសព្វថ្ងៃនេះ បានកើតឡើងចេញពីមុខជំនួញតូចតាច និងដើមទុនតិចតួចប៉ុណ្ណោះ តែអាចមានសមត្ថភាពកសាងជំនួញឱ្យក្លាយជាពហុក្រុមហ៊ុន មានភាពរឹងមាំជោគជ័យគ្រប់មុខជំនួញ។

ការកសាងជំនួញពីតូច អាចអភិវឌ្ឍន៍ខ្លួនឱ្យក្លាយជាក្រុមហ៊ុនយក្ស មានក្រុមហ៊ុនបុត្រសម្ព័ន្ធប្រឡាក់ក្រឡាគ្នា ដូចសំបុកពីងពាងបែបនេះ មិនមែនគ្រប់សហគ្រិនទាំងអស់ អាចមានសមត្ថភាពធ្វើបាននោះទេ ព្រោះត្រូវការប្រើប្រាស់យុទ្ធសាស្ត្ររកស៊ី​មួយដ៏ពូកែ និងល្អបំផុត ទើបអាចក្តោបក្តាប់មុខច្រើនក្នុងពេលតែមួយបាន។

យើងទាំងអស់គ្នាប្រហែលជាធ្លាប់លឺហើយថា សហគ្រិនពូកែអាចមានសមត្ថភាពក្តោបក្តាប់ជំនួញច្រើនក្នុងពេលតែមួយ ហើយមានអ្នកខ្លះយល់ច្រឡំថា ឱ្យតែបង្កើតក្រុមហ៊ុនច្រើនទៅជោគជ័យហើយ ឬក្លាយជាសហគ្រិនពូកែម្នាក់ តាមពិតនៅក្នុងអត្ថន័យនៃការបង្កើតក្រុមហ៊ុនច្រើន គឺជាជំនួញបំពេញគ្នាទៅវិញទៅមក ដែលBusiness Cambodiaដាក់ថា «យុទ្ធសាស្ត្ររកស៊ីបែបពីងពាង» ពោលបង្កើតទម្រង់រកស៊ីបែបសំបុកពីងពាង ប្រឡាក់ក្រឡាគ្នា ជាប់គ្នាយ៉ាងស្អិតរមួត បំពេញឱ្យគ្នាទៅវិញទៅមក ឬលំអឱ្យគ្នា។

សម្រាប់ក្រុមហ៊ុនយក្សជីប ម៉ុង បានប្រើប្រាស់យុទ្ធសាស្ត្ររកស៊ីបែបពីងពាងនេះ ដោយផ្តើមចេញពីក្រុមហ៊ុនមួយ រួចបង្កើតក្រុមហ៊ុនបន្តបន្ទាប់ទៀត ក្រោយពីក្រុមហ៊ុនមុនៗមានភាពរឹងមាំលើទីផ្សារ និងទទួលបានផ្លែផ្កា ទើបឈានទៅបើកក្រុមហ៊ុនថ្មីដែលជួយជ្រុមជ្រែងមុខរបរមុន។ ជាក់ស្តែង ក្រុមហ៊ុនជីប ម៉ុង ជាក្រុមហ៊ុនអភិវឌ្ឍន៍អចលនទ្រព្យសាងសង់លំនៅឋា អគារពាណិជ្ជកម្ម ផ្សារទំនើប ហើយក្រុមហ៊ុនដែលជួយជ្រុមជ្រែង គឺក្រុមហ៊ុនផលិតគ្រឿងសំណង់ មានក្បឿង ស៊ីម៉ង់ត៍ ទុយោរ ដេកជាដើម។

បន្ថែមពីលើនេះ ក្រុមហ៊ុនបានបង្កើតធនាគារChip Mong Commercial Bank  ដែលសហការជាមួយក្រុមហ៊ុនសំណងChip Mong Land សម្រាប់ធ្វើការផ្តល់កម្ចីទិញលំនៅឋាន និងប្រភេទអចលនទ្រព្យផ្សេងៗដែលក្រុមហ៊ុន ដោយមិនប្រើប្រាស់ធនាគារដទៃ ហើយបង្កភាពងាយស្រួល និងផលចំណេញផ្សេងៗដល់អតិថិជន។

គួរបញ្ជាក់ថា ចំណុចខ្លាំងរបស់យុទ្ធសាស្ត្ររកស៊ីបែបពីងពាង គឺអាជីវកម្មមួយអាចជោគជ័យ និងឈរជើងរឹងមាំលើទីផ្សាររួចហើយ ទើបបង្កើតក្រុមហ៊ុនបុត្រសម្ព័ន្ធថ្មីមួយទៀត ដែលអាចសហការរកស៊ីជាមួយក្រុមហ៊ុនចាស់បាន ហើយជំរុញឱ្យក្រុមហ៊ុនទាំង២ទទួលបានជោគជ័យ និងខ្លាំងដូចគ្នា។

ត្រង់ចំណុចនេះសហគ្រិនជំនាន់ថ្មី ត្រូវស្វែងយល់ឱ្យបានច្បាស់ មិនមែនឱ្យតែបង្កើតក្រុមហ៊ុនច្រើនទៅធ្វើឱ្យជោគជ័យលឿននោះទេ ក្រុមហ៊ុនរកស៊ីទាំងអស់ត្រូវជួយជ្រុមជ្រែងគ្នា ឬបំពេញការផ្គត់ផ្គង់ទៅវិញទៅមក ទើបអាច​មានសក្តានុពលើទីផ្សារ ជាក់ស្តែងជីប ម៉ុង មាន​ក្រុមហ៊ុនផលិតស្រាបៀរ ហើយបង្កើតក្រុមហ៊ុនផលិតសំបកស្រាបៀរមួយទៀត ដើម្បីបំពេញគ្នា ធ្វើឱ្យក្រុមហ៊ុនចំណេញច្រើន ហើយមិន​បាច់​ពិបាកក្នុងការស្វែងរកដៃគូផ្គត់ផ្គងផង។

យុទ្ធសាស្ត្ររកស៊ីបែបពីងពាង មិនមែនបង្កើតរបរខុសវិស័យគ្នា ឬមិនបំពេញឱ្យគេទេ បើយើងដើរតាមយុទ្ធសាស្ត្រនេះ វាបង្កភាពងាយស្រួលក្នុងការ​គ្រប់គ្រង តែបើបង្កើតរបរមិនតាមគំរូនេះ ដែលមិនបំពេញឱ្យគ្នាយើងហាក់ពិបាកគ្រប់គ្រងណាស់ ដោយ​សារវា​មុខរបរខុសគ្នា គំរូដឹកនាំ និងរបៀបរកស៊ីខុសប្លែក។

សូមបញ្ជាក់ថា ក្រុមហ៊ុនជីប ម៉ុង នៅតែបន្តភាពរីកចម្រើនទៅមុខជាលំដាប់ ហើយវាជាគំរូរកស៊ីដ៏ល្អមួយ សម្រាប់សហគ្រិនជំនាន់ក្រោយអាចរៀនសូត្រ ហើយត្រូវស្វែងយល់យុទ្ធសាស្ត្ររកស៊ីមួយនេះឱ្យបានច្បាស់ មុននឹងចាប់ផ្តើម​បង្កើតក្រុមហ៊ុនច្រើនឡើង ព្រោះមិនកំណត់ថា បង្កើតក្រុមហ៊ុនច្រើនជោគជ័យនោះទេ បើយើង​បង្កើតឡើងមិនតាមក្បួនយុទ្ធសាស្ត្រត្រឹមត្រូវ៕

អត្ថបទដោយ៖ ម៉ន វុទ្ធាEmail: [email protected],Facebook:Morn Vuthea

អ្នកនិពន្ធសៀវភៅ«សហគ្រិនអចលនទ្រព្យជំនាន់ថ្មី» ត្រៀមចេញផ្សាយឆាប់ៗនេះ

Adtag for Mobile Grow:-
Online

RELATED ARTICLES