កត្តាធំៗ ៣ ដែលធ្វើឲ្យធនាគារ អេស៊ីលីដា (ACLEDA) ដណ្ដើមទីផ្សារបានច្រើនជាងគេ និងជាប់ជា ធនាគារលេខ១នៅកម្ពុជា!

 

ធនាគារអេស៊ីលីដា ជាធនាគារដ៏ចំណាស់មួយ និងកំពុងឈរនៅលើកំពូលតារាងក្នុងចំណោមធនាគារទាំងអស់នៅកម្ពុជា។ ធនាគារនេះបានវិវត្តន៍ខ្លួនពីធនាគារដែលនៅបាតតារាងលេខរៀងទី​ ១៣ ក្នុងចំណោមធនាគារទាំង ១៣ នៅអំឡុងឆ្នាំ ២០០០ មកជាធនាគារឈរនៅកំពូលតារាងដោយចំណាយពេលប្រមាណ ១០ ឆ្នាំ។ តើមានកត្តាអ្វីខ្លះដែលបានធ្វើឲ្យធនាគារមួយនេះទទួលបានភាពជោគជ័យខ្លាំងបែបនេះ? 

លោកបណ្ឌិត អ៊ិន ចាន់នី ដែលជា CEO របស់ធនាគារនេះ បានមានប្រសាសន៍ឲ្យដឹងថា៖ ធនាគារអាចវិវត្តន៍ខ្លួនពីធនាគារដ៏តូចមួយ និងឈរនៅបាតតារាងមកជាធនាគារ ដែលទទួលបានការគាំទ្រខ្លាំងដោយចំណាយពេលត្រឹម ១០ ឆ្នាំ ដោយសារ កត្តាសំខាន់ ៣ ធំៗនេះ៖

១.ធនធានមនុស្ស

នៅដំណាក់កាលនៃការចាប់ផ្ដើមដំបូង ស្ថាប័ននេះបានប្រឈមមុខនឹងបញ្ហាដ៏ធំមួយគឺកង្វះធនធានមនុស្សដែលមានសម្ថភាព និងចំណេះជំនាញច្បាស់លាស់។ ដោយយល់ច្បាស់ថាធនធានមនុស្ស គឺជាកត្តាចម្បងដែលស្ថាប័នត្រូវដោះស្រាយ អេស៊ីលីដា បានចំណាយពេលប្រមាណ ២​ ឆ្នាំ ជ្រើសរើស និងបណ្ដុះបណ្ដាលធនធានមនុស្ស ដើម្បីបំពេញតម្រូវការរបស់ស្ថាប័នខ្លូន។ ធនធានមនុស្សទាំងនោះបានខិតខំជួយឲ្យស្ថាប័ននេះរីកលូតលាស់យ៉ាងឆាប់រហ័ស និងជាផ្នែកដ៏សំខាន់ក្នុងការជួយជំរុញឲ្យស្ថាប័ននេះមានថ្ងៃនេះ។

២.បច្ចេកវិទ្យា

អេស៊ីលីដាបានព្យាយាមស្វះស្វែងរកមធ្យោបាយ និងបង្កើតអ្វីថ្មីដែលផ្តល់ភាពងាយស្រួល និងផ្សារភ្ជាប់ទំនាក់ទំនងឲ្យកាន់តែជិតស្និតជាមួយដៃគូអាជីវកម្ម ឬអតិថិជន ទើបស្ថាប័ននេះបានចាប់ផ្ដើមឈានជើងចូលដល់ការប្រើប្រាស់បច្ចេកវិទ្យាមុនដំបូងគេនៅកម្ពុជាដែលអាចឲ្យអតិថិជនអាចធ្វើការដក និងដាក់ប្រាក់បានគ្រប់សាខាទាំងអស់របស់ធនាគារដោយពុំមានភាពស្មុគស្មាញ។

៣.យុទ្ធសាស្រ្តទីផ្សារ

នៅអំឡុងពេលទើបតែដំណើរការដំបូងក្រោយពេល អេស៊ីលីដា បានវិវត្តន៍ខ្លួនពីអង្គការមកជាធនាគារ  បានធ្វើឲ្យមានការភាន់ច្រលំជាច្រើន និងបាត់បង់ទំនុកចិត្តពីអតិថិជន។​ ដើម្បីដោះស្រាយនេះ ស្ថាប័ននេះបានធ្វើការយ៉ាងខ្លាំងក្លាលើការផ្សព្វផ្សាយ និងពង្រីកវិសាលភាពកេរ្តិ៍ឈ្មោះរបស់ខ្លួន ដើម្បីឲ្យគេគ្រប់គ្នាបានស្គាល់ពី ផលិតផលសេវាកម្ម និងមានទំនុកចិត្តមកលើខ្លូ​ន។ ការងារនេះបាននាំភាពជោគជ័យ និងភាពលេចធ្លោមកដល់ស្ថាប័នទាំងមូល ធ្វើឲ្យមានទំនុកចិត្តឡើងវិញពីដៃគូអាជីវកម្ម។

លោកបណ្ឌិត អ៊ិន ចាន់នី ធ្លាប់បានបញ្ជាក់ថា ធនាគារអេស៊ីលីដា នឹងកាត់បន្ថយការជ្រើសរើសបុគ្គលិកជាបន្តបន្ទាប់រហូតឈានដល់ឈប់រើសចូលបម្រើការងារតែម្ដងនៅឆ្នាំ ២០១៩ ដោយការងារធនាគារមួយភាគធំនឹងត្រូវជំនួសដោយបច្ចេកវិទ្យាវ័យឆ្លាតផ្សេងៗ។ សិស្សនិស្សិតដែលកំពុងសិក្សា និងចង់សិក្សាជំនាញធនាគារ គួរគិតពិចារណាឡើងវិញត្រង់ចំណុចនេះ ហើយកុំព្យាយាមស្វែងរកឳកាសការងារណាដែលគ្រឿងម៉ាស៊ីន និងបច្ចេកវិទ្យាអាចជំនួសការងារមនុស្សអីប្រសើជាង ចៀសវាងខាតបង់ពេលវេលា និងប្រាក់ឥតប្រយោជន៍៕

ដកស្រង់ពីសៀវភៅ៖​ ត្រៀមចេញរកស៊ីឲ្យចំគោលដៅ

អត្ថបទដោយ៖ ប៉ិច សេងហ៊ាង

 

 

Online

តើលោកអ្នកពេញចិត្តអត្ថបទមួយនេះទេ?​សូមចូលរួមផ្តល់មតិកែតម្រូវ!

RELATED ARTICLES